Voatery nitifitra fampitandremana mihitsy ireo miaramila avy amin’ny Zrps Alpha 12, any amin’iny distrika Betroka iny, ny mba hametrahan’ireo fokonolona amina tanana kely iray ny fitaovam-piadiana teny am-pelan-tanan’izy ireo. Efa saika rà nandriaka no niseho saingy soa ihany …
Ny zava-nisy : ny herinandro lasa teo, dia nisy fanafihan-dahalo nivaivay tao amina kaominina iray any amin’iny distrika Betroka iny. Omby efatra no voalaza fa lasan’ireo olon-dratsy. Nanao ny fanarahan-dia avy hatrany ireo fokonolona tao an-toerana ary hita, hoy ny fampitam-baovao, fa nijanona tao amina tanàna iray antsoina hoe Sakasoa, ao amin’ny kaominina Ianabinda ireo dian’omby. Nangataka fanazavana tamin’ireo mponina tao araka izany ireto mpanara-dia, saingy voalaza fa « vava-basy avy hatrany, niaraka tamin’ny fandrahonana ho faty » no niandry ireto farany. Hany herin’izy ireo, rehefa tsy afa-nanohitra ireto mponina mitam-basy ireo mpanara-dia, dia nila vonjy tany amin’ireo miaramila mpampandry tany tany an-toerana. Nidina avy hatrany tany amin’io toerana io ireo mpitandro filaminana, saingy vao telo kilaometatra monja tsy hidirana ny tanana dia niandry sy nihantsy ireto miaramila tamin’ny basy sy fitaovam-piadiana isan-kazazany ireo mponina tao amin’io tanana io. Efa saika raikitra ny fifandonana, saingy mbola nanao izay fara-heriny nandresy lahatra ireo mponina ny mba hametrahana ireo fitaovam-piadiana ireto miaramila. Tonga mihitsy tamin’ny fanaovana tifitra fampitahorana sy fampitandremana moa izany, ka dia nilefitra ihany ireo mponina. Naorona avokoa ireo basy teny am-pelan-tanan’ireo mponina ka nosavaina ny taratasy. Ireo tsy nisy izany, tonga dia nogiazana avy hatrany. Mahakasika ireo olona nitana izany basy tsy ara-dalàna izany kosa, dia nentina natolotra ireo mpanao fanadihadiana. Anisan’ireo olona ireo moa ireo sahy nikomy sy nandrahona ireo tompon’omby mpanara-dia. Basim-borona sivy, niaraka tamin’ny basy vita gasy roa ary basy « revolver » iray no azo teny am-pelan-tanan’izy ireo tamin’io fotoana io. Marihana, fa niaiky tanteraka ny fahaverezan’ireo omby tao amin’io tanana io ireo mponina ary efa natao ny fomba amam-panao mahazatra amin’izany. Efa naverina ireo omby efatra nangalarina ary mbola nampiana 16 hafa izany ho fanonerana ny heloka nataon’izy ireo.
Ankoatr’ireo fitaovam-piadiana ireto , dia fantatra fa nisy basim-borona tsy ara-dalàna telo hafa ihany koa sarona tany Ivahona, ary nanampy ireo ny ody gasy iray gony azo teny am-pelan-tanan’ireo olon-dratsy
m.L
