- Publicité -
vendredi 27 janvier 2023
DomicileFaits-DiversFakàna an-keriny : Roa lahy avotra teny am-pelatanan'ny dahalo

Fakàna an-keriny : Roa lahy avotra teny am-pelatanan’ny dahalo

Avotra soa aman-tsara izy ireo.

Roa lahy avotra teny am-pelatanan’ny dahalo 15 andro katroka taorian’ny nangalan’ireo olon-dratsy an-keriny azy roa lahy ireto no nahitan’ny zandary azy ireo, velon’aina soa aman-tsara. Tany amin’iny kaominina Brieville distrikan’i Tsaratanana izy ireo no very, tao Marotsipoy, distrikan’Anjozorobe izy ireo no avotra. Ny andron’ny 18 novambra lasa teo tokoa mantsy dia nitrangana fanafihana mitam-piadiana tao amin’ny tanana iray, tao amin’ny fokontany Antsapandrano, kaominina Brieville. Dahalo am-polony maro nirongo fitaovam-piadiana isan-karazany, toy ny basy sy zava-maranitra no tonga nanafika io tanana io. Ankoatry ny zavatra lasan’izy ireo dia nentin’izy ireo an-keriny nanaraka azy ny lehilahy roa, 47 sy 39 taona. Izy roa lahy ireto, izay marihana fa manana rohim-pihavanana ihany satria dia mpizaodahy, araka ny fampitam-baovao azo. Tsy mitsahatra ny mandeha izy ireo, mandeha tongotra na andro na alina, hoy ny fitantaran’izy ireo ary indraindray dia zara raha misakafo eny an-dalana. Tetsy andanin’izay ihany koa anefa, nanao ny ainy tsy ho zavatra ireo zandary, rehefa nahare ny zava-nitranga, tamin’ny fikarohana ireto olona nalain’ny dahalo an-keriny ireto. Tao anatin’izany 15 andro nitazoman’ireo olon-dratsy azy ireto izay dia nisy hatrany ny fanarahan-dia sy ny fanangonana vaovao. Ny harivan’ny alakamisy lasa teo dia fantatra ny toerana niafenan’ireo olon-dratsy sy ireo olona eny am-pelan-tanan’izy ireo. Ao amin’ny faritra iray, atsimon’ny Bemandrona, kaominina Marotsipoy, distrikan’Anjozorobe. Nametraka paik’ady ireo zandary hanavotana azy roalahy, ka omaly vao maraim-be no nitontonana tao amin’io tanana io ireo mpaka an-keriny. Avotra soa aman-tsara ! « Salama tsara, tsy nisy nanombinana ireto olona ireto. Tsy nisy naninona ihany koa, tetsy andanin’izay ny teo anivon’ireo zandary » hoy ny fanazavana azo. Na izany aza, tafaporitsaka ireo olon-dratsy ary mbola manohy ny fikarohana azy ireo mpitandro filaminana avy eo anivon’ny tobim-paritra Brieville. Izy roa lahy ireto kosa, tamin’io andron’ny omaly io ihany dia efa an-dalana namonjy ny tokantranon’izy ireo tsirairay avy.

m.L

- Publicité -
Suivez nous
311,259FansAimer
1,754AbonnéesSuivre
Articles qui pourraient vous intéresser

LAISSER UNE RÉPONSE

Veuillez saisir votre commentaire !
Veuillez entrer votre nom ici