Nihevitra angamba izy ireo, fa ho mora foana ny hitsoahana ireo mpanenjika rehefa hiakatra ny tohatohatra 416 ry zalahy. Tsy izay anefa no nitranga fa efa zatra kotrana ihany koa ireo pôlisy mpanenjika ka noraisim-potsiny teo akaikin’ny sarin’i Masina Maria ireto olon-dratsy izay vao avy nanao ny asa ratsiny. Ny alatsinainy teo tokoa mantsy, dia nisy olona lasibatry ny mpanendaka teny Mahamasina. Telo lahy ireo mpanendaka ary rehefa nahavita ny asa ratsiny dia nitsoaka nihazo an’io tohatohatra miakatra eny Andohalo io. Efa malaza ho faritra mena tokoa mantsy iny toerana io, ary marobe ireo lasibatra tamin’izany, indrindra fa ireo olona miezaka manatanja-tena vao maraina sy ireo olona mody alina. Tsy misy sahy manaraka intsony ihany koa ireo olon-dratsy rehefa mihazo iny làlana iny. Tamin’ity indray mitoraka ity anefa, nampandre haingana ny pôlisy izay misahana ny fifamoivoizana teo akaiky teo ilay lasibatra. Nandray ny andraikiny avy hatrany ireto farany ary niroso tamin’ny fanenjehana ireo mpanendaka telo lahy ary io niafara tamin’ny fahatrarana azy ireo io. Nentina natolotra ny pôlisin’ny kaomisarian’ny boriborintany fahadimy avy hatrany moa ireo mpanendaka ireto mba hofotorana.
m.L