Fiarovan’Andriamanitra no tsy nahafaty ity renim-pianakaviana ity omaly teny amin’ny 67 ha Atsimo. Niara-niatsena tamin’ny zanany vavy kely izy no nisy andian-jiolajy nanantona tampoka ary nisintona ny pôketra teny antanany. Tampoka ary tsy nisy nanam-po io fanafihana io. Niezaka niaro ny fananany anefa ilay ramatoa izay tokony eo amin’ny 50 taona eo ho eo. Niezaka niondrika izy ary namihina ilay pôketra nanandrify ny kibony. Nahita izany ny iray tamin’ireo jiolahy ka namoaka antsy lava lela ary tonga dia nanindrona ilay ramatoa teo amin’ny faritra nanandrify ilay pôketra. Niantefa teny amin’ny sandrin’ilay ramatoa anefa izany ka nadratra azy. Nihoraka niantso vonjy ity farany ka lasa nitsoaka ireo joilahy. Teo vao nifamonjen’ny mpandalo izy mianaka. Indrisy fa efa ra nijininika no hita teo amin’ny sandrin’ilay ramatoa. Fa ny nahagaga dia 10 minitra taty aoriana vao tonga teny an-toerana ny polisy izay milaza fa efa manao hetsika manokana eny amin’iny toerana iny.
T.M
