Ho fanoherana ny fanenjehana ireo mpianatra ho mpitsabo voarohirohy amin’ilay raharaha nahafatesana mpiteraka tao amin’ny hôpitaly Befelatanana , ny volana lasa teo dia nanatanteraka fitokonam-be na « sit-in » teny amin’ny Esplade Ankatso ny fikananan’ny mpianatra ao amin’ny toeram-pampianarana ho mpitsabo na faculté de Médecine ao amin’ny Oniversiten’Anananarivo, omaly maraina. Tonga maro be tokoa ireo mpianatra. Saika niato avokoa, araka izany, ny fampianarana tao amin’ity toeram-pampianarana ity mba ho fanehoana firaisankina amin’ireo namany voakasik’izao raharaha izao. Nandritra izany no nanomezan’izy ireo 48 ora ny Fitondram-panjakana foibe, indrindra ireo minisitera rehetra voakasika ny hanesorana ny mpianatra ho mpitsabo ao anatin’izao raharaha izao. Raha tapitra izay fe-potoana izay ka tsy misy valiny mahafa-po dia nilaza ny handray fepetra henjana ny fikambanana mba hanamafisana ny fitakiana. Fepetra izay hotapahana mandritra ny fivoriambe izay hatao ny Alakamisy izao.
T.M.