Ity no atao hoe nokibokiboin’ny marina ka teny imasom-bahoaka no niady vola, taorian’ny asan-jiolahy nataony ireto andian-jiolahy tao Soanierana Ivongo ireto. Ny 27 may teo nitranga ny raharaha ka taorian’ny fanafihana mitam-piadiana nataon’izy ireo ka nahazoan’izy ireo vola roa tapitrisa ariary tamin’ity mpandraharaha iray notafihan’izy ireo, dia raikitra ny ady vola tamin’izy telo lahy, teny an-dàlana nandositra. Notsindronin’ny roa tamin’ny antsy ary navelin’izy ireo ho maty an-dalana teo ilay naman’izy ireo antsoina hoe Ngilo Be, taorian’izay. Tsy nipetraka mora anefa ny polisy tany an-toerana tarihin’ny kaomisera Tsima Angelo Felix, fa niezaka nikaroka ireto andian-jiolahy roa sady nanao fanafihana mitam-piadiana no mbola namono nahafaty ny namany ireto, ka ny 11 jolay teo nody ventiny ny rano natsakain’izy ireo, satria tratra noho ny vava tsy ambiny ny iray tamin’ireo andian-jiolahy tao amin’ny tanàna antsoina hoe Antenina distrikan’i Soanierana Ivongo ihany. Tratra niaraka taminy koa ilay basy poleta fampiasan’izy ireo manao ny fanafihana, nandritra izany ; tsy nandà ny heloka vitany anefa ity jiolahy ity nandritra ny fakana am-bavany azy. Mitohy kosa hoy ny “officier” Tsima Angelo mihazona ny kaomisarian’i Soanierana Ivongo, fa mitohy ny fikarohana ny namany ; izay efa nambaran’ity namany efa tratra ny toerana misy ity namany…
Malala Didier