Nitondra fanampim-panazavàna mahakasika ilay lahatsoratra teto amin’ny Midi madagasikara, lah. 10308, nivoaka ny alatsinainy teo, tao amin’ny pejy faha-17, izay milaza ny momba ny « Analamahitsy : zaza telo taona maty, nianjera avy eny ambony rihana » ny fianakaviany. Araka ny fanazavàna nomen’Atoa Henri, raiben’ilay zaza namoy ny ainy, izay tonga teto aminay dia nisy fahadisoana tao amin’ilay lahatsoratra, mahakasika ny fomba nahafatesan’ity tsy manan-tsiny ity, izay tsy nianjera avy eny « ambony rihana » akory sy hoe « maty tsy tra-drano » araka ny voalaza ao anaty lahatsoratra. Ho fanajàna ny alahelon’ireo fianakaviana sy tsy hamohazana fota-mandry intsony anefa dia tsy ho lazaina eto ny tena zava-nitranga tamin’io fotoana io, araka ny fangatahan’izy ireo hatrany. Eo anatrehan’izay dia manantitra ny fialàn-tsiny amin’ny fianakaviana manontolo ny amin’ny zavatra mety ho naterak’io hadisoana io.
m.L