Mpanendaka efa nifampitadiavana teny amin’ny faritra Anosibe ary isan’ny nandray anjara tamin’ny fanafihana « Cash point » Airtel teny Anosizato tamin’ny volana Jona 2017 ka naharoba 700 000 ariary no voasambotra ny Alahady 3 septembre lasa teo. Tamin’io andro io, olona hamonjy fodiana no nendahiny. Niantso vonjy ity farany ka nadray andrikitra avy hatrany ny Vaomeran’ny fandriam-pahalemana sy ny polisy avy ao amin’ny kaomisarian’ny Boriboritany faha-5 manana ny foiben-toerany etsy Mahamasina ka izao izy sarona teny Anosibe-tsena izao, teo akaikin’ny Pharmacie Volahanta tamin’ny 2 ora maraina izao. Mbola tratra teny aminy ny antsy lava lela nampiasainy tamin’ny asa ratsiny. 25 taona ity jiolahy ity, ary efa nigadra noho ny resaka fanedahana ihany. Ny taona 2015 izy no niditra teny amin’ny Fonjan’Antanimora ary nivoaka ny volana jona 2017. Araka izany, niverina any am-ponja indray izy rehefa natolotra ny Fampanoavana omaly 6 septambra.
T.M.