Diabe namakivaky tendrombohitra sy lohasaha tamin’ny alalan’ny moto cross sy Quad no nataon’ny loholon’i Madagasikara Atoa Rabenony Andrianirina niaraka tamin’ny ben’ny tanana avy any Ambohimandroso Amparafaravola, ny olon-tsotra, ny mpitandro ny filaminana, ny mpasam-panjakana, izay nahatratra tany amin’ny olona 15 tany ho any, ny faha-13 oktobra 2017 lasa teo, hihazo an’Analanjirofo . Raha lalan-kely fandehanana an-tongotra no nisy teo aloha dia nanolotra vola ho an’ny fokonolona ny loholon’i Madagasikara hanaovana asa tana-maro hanamboarana ny lalana mba ho azon’ny moto sy ny kibota haleha, mba hamoahana ny vokatra. Raha niainga tamin’ny 11 sy 30 minitra tao Tanandava Imerimandroso ny delegasionina dia tany amin’ny 7 ora sy sasany tany ho any no niditra ny kaominina Sahatavy, Distrikan’i Vavatenina. Vahoaka marobe hatrany no nitsena teny amin’ny lalana sy ny tanana nandalovana noho ny fahavakisan’ity lalana ity, nisaotra ny loholon’i Madagasikara.N anambara ny ben’ny tananan’i Sahatavy fa faly izy ireo ary nisaotra ny loholona Atoa Rabenony Andrianirina amin’izao ezaka goavana nataony izao, satria afaka mifamezivezy ny vahoaka eo amin’ny famoahana ny vokatra ary hisy ny fampandrosoana isaky ny kaominina. Mbola manano sarotra anefa ny fampiasana ny lalana noho ny fisian’ny fiakarana mideza sy ny orana mirotsaka any anaty ala ary ny lavadavaka noho ny tsy fahaizan’ny fokonolona nanamboatra ny lalana. Eo ihany koa ny mbola tsy fisian’ny tetezana amin’ireo rano sasany ka manahirana ny fiampitana aminy raha fahavaratra. Azo atao tsara anefa ny manatsara izany, hoy ny fanazavana, raha misy ny hoenti-manana sy ny firaisan-kinan’ny rehetra.
Janus R