Ankoatr’ireo asa isan-karazany efa natao, dia fantatra izao, fa vita tanteraka ny fanitarana sy ny fanatsarana ny fiangonana Fjkm Rangaina. Hatolotra amin’ny alahady ho avy izao, eny an-toerana izany asa vita rehetra izany araka ny fanazavana azo. Marihana fa, ity fanitarana ity dia isan’ny tafiditra tao anatin’ny hetsika fankalazana ny faha-150 taonan’ny fiangonana. Amin’io alahady 4febroary io ihany koa no hanakatonana tanteraka izany fankalazana izany. Araka izany dia miantso ny zanak’ampielezana rehetra ireo tompon’andraikitra, ho tonga eny an-toerana amin’izany fotoan-dehibe izany. Manomboka amin’ny sivy ora sy sasany maraina ny fotoam-pivavahana, araka ny fantatra hatrany ary hisy ny fandraisana ny fanasàn’ny Tompo. Aorian’izany, raha ny fanazavana azo hatrany dia hisy ny fiaraha-misakafo izay hatao eny an-toerana. « Ny sakafo no hiraisana amin’io fotoana io fa ny fitaovam-pihinanana no samy mitondra » hoy ny tompon’andraikitra. Manentana ny fahatongavan’ny rehetra araka izany, izy ireo.
m.L
