Tafepetraka amin’ny toerany ireo mpikambana ao amin’ny filankevi-pitantanan’ny ofisim-paritry ny fizahan-tany eto Vakinankatra. Efa mandray ny asany ireo mpitantana vaovao ireo hatramin’ny nahavitana ny fifidianana, izay natao ny faha-12 janoary 2018. Lany ho filohan’ny filankevi-pitantanana Atoa Rakotoson Hary Naivo. Izy izany no handimby an-dRtoa Resette Andrianaivo, filoha teo aloha. Vaiandohan-draharaha ho an’ny filoha vaovao, ny hampandrosoana ny lafiny ara-pizahan-tany eto Vakinankaratra. Ezahina, hoy izy, ny hitazonana ny tolotra sy ny tinady, indrindra fa ny fampahafantarana ireo mpizaha-tany ny zava misy manintona eto Antsirabe mba hitazomana azy ireo haharitra eto ary mba tsy hijanona ho fandalovana fotsiny eto Antsirabe. Ankaotra izay, efa maty lamina ny fandaharam-potoana ho an’ny taom-piasana sy paikady entina hampandrosana ny fizahan-tany eto Vakinankaratra. Marihina fa mahatratra 82 ny mpikambana ao amin’ny ORTVA, 11 kosa no isan’ny ao amin’ny filankevi-pitantanana.
Andry N.
Antsirabe
Hisy sarin’ady hiarahan’ny foloalindahy hatao
Omaly no natomboka ny fanazaran-tena ho an’ny manamboninahitra mpianatra sy mpianatra ho manamboninahitra ao amin’ny foloalindahy. Antsoina hoe “FANOHITRA” ity sarin’ady ity . Ao amin’ny distrikan’Antsirabe II, dia Andranomanelatra sy Mandray, no anatanterahana izany. Haharitra 5 andro ny fanazaran-tena. Izany no atao dia mba hampiharana sy hanehoana ny fahaiza-manaon’ireo tanora mandrato fahalalana amin’ny vondron-taranja nandritra ny fianarana teorika tany an-tsekoly. Ankaotra izay, ny fanamafisana ny fahaiza-manaon’ireo mpandray anjara rehetra. Sekoly miaramila miisa 5 no mandray anjara amin’ity fanazaran-tena ity, dia ny « Ecole d’Etat-Major » ( EEM), ny « centre de perfectionnement des officiers » (CPO) ny Akademia miaramila, ny ENSOA ary ny SEMIPI, ka manodidina ny 650 no isan’ireo foloalindahy hiatrika ny sarin’ady. Hitarika ny fanazaran-tena ny jeneraly Rakotoarijaona Josoa, talen’ny sekoly Etat-Major sy ny ny jeneraly Ramasy Razafindratovo Heritiana, kaomandin’ny Akademia Miaramila.
Andry N.
