Efa anisan’ny asan’ny zandamariam-pirenena ny miady amin’ireo mpitrandraka ala tsy ara-dalana sy ireo mpanondrana ny harem-pirenentsika, saingy mbola hohamafisina amin’ny tsaratsara kokoa izay manomboka izao. Io no ventin-kevitra nivoitra nandritra ny fihaonan’ny Talen’ny kabinetran’ny Sekreteram-panjakana miadidy ny zandary, ny Jly Tsirivelo Nicolas, tamin’ny solontenan’ny Sampandraharahan’ny firenena mikambana miaro ny tontolo iainana sy ireo biby arovana manokana, izay mamita iraka eto amintsika, Atoa Jorge Rios, « Chief of The Global Programme for Wildlife and Forest Crime », tetsy amin’ny birao fiasàny tetsy Betongolo. « Mahatsapa mantsy ity sampandraharaha iray eo anivon’ny firenena mikambana ity fa ny Zandarimariam-pirenena no tena manana toby miely patrana manerana ny nosy ka nofidian’izy ireo manokana mba hiara-kiasa aminy amin’ny fiarovana ireo biby arovana sy ny tontolo iainana amin’ny ankapobeny», ka nisy izay fangataham-piarahamiasa izay. Vonona hatrany hifanome tanana ny zandary, hoy hatrany ity tompon’andraikitra ambony ity. « Ary hanao izay ho afany amin’ny fiarovana ny tontolo iainana. Nohamafisiny fa efa tafiditra amin’ireo taranja hanofanana ny zandary any amin’ireo sekolin’ny Zandarimariam-pirenena ny fiarovana ny tontolo iainana.»
m.L
