Ela nanaovan-dratsy ka sendra ny nahay azy. Tovolahy iray 25 taona eo, voalaza fa gaigilahy ikoizana amin’ny fangalarana akoho amam-borona sy vaky trano no saika matin’ny fitsaram-bahoaka, omaly, tao amin’ny Fokontany Amborongony Toliara. Teo am-pangalarana akoho ity mpangalatra rain-dahiny ity no tratra am-body omby, ka tsy namelan’ny olona raha tsy naratra mafy tsy afa-nitsangana intsony niharan’ny vono sy daroka ary kapoka vantan-kazo. Raha ny fanazavana azo, dia mponina eny amin’ny Fokontany ihany ity tovolahy efa nigadra in-droa noho ny hala-botry ity. Rehefa nivoaka ny fonja izy ny 20 aprily teo, dia nirongatra indray ny halatra akoho amam-borona, ka samy nanara-maso akaiky ny biby fiompiny ny mpiara-monina, satria efa ela no niandrasana amin’ity tovolahy manao mpamosavy malemy mamely ny manodidina ity, fa izao vao tratra, hoy ny vaovao.
Eric Manitrisa
