Mirongatra ny halatra lavanila manta eny an-tsaha any amin’ny Faritra Sava, Diana ary Sofia iny tato ho ato, ka mihorohoro tanteraka ireo tantsaha mpamboly. Afak’omaly, lehilahy iray tratra ambodiomby teo am-pangalarana lavanila maitso no matin’ny fitsaram-bahaoka, tao Berakataka any amin’ny Distrikan’ Ambanja. Rehefa tra-tehaky ny tompon’ny saha niambina ny tanimbolin-davanilany ity jiolahy ity, dia tsy nanaiky mora ny fisamborana azy, fa avy hatrany dia nofirainy tamin’ny antsy lava lela teny aminy ny tompon-davanila, ka naratra. Niantso vonjy ny niharam-boina, ka raikitra ny fanenjehan’ny fokonolona an’ilay mpangalatra nitsoaka. Voasambotra ity farany, ka niharan’ny hatezeram-bahoaka avy hatrany, ary maty teo no ho eo. Araka ny voalazan’ny tati-baovao voaray avy any an-toerana, dia vao avy nivoaka ny fonja avy namita sazy noho ny raharaha halatra lavanila ny volana martsa teo ity jiolahy namoy ny ainy ity, kanefa dia izao mbola namerin-keloka nanohy ny asa ratsiny izao indray.
Eric Manitrisa