Nitrangana fanafihan-jiolahy nitam-basy indray tao an-tampon-tanànan’i Vangaindrano, ny alin’ny zoma hifoha ny asabotsy teo, ka tokantrano iray tao amin’ny Fokontany Ambadikala no voaroba, ary lasan’ny efa-dahy tsy nisaron-tava tamin’izany ny lelavola an-tapitrisany vidin-jirofo. Nandritra ny fanafihana dia maty tsy tra-drano nofitirin’ireo jiolahy ny ramatoa tompon-trano, raha naratra mafy mbola tsaboina any amin’ny hopitaly kosa rangahy vadiny. Raha ny fanazavan’ity raim-pianakaviana niharam-boina ity, dia fantan-dramatoa vadiny ny iray tamin’ireo jiolahy nanafika azy ireo, ka tsy nisalasala ireo olon-dratsy fa avy hatrany dia nitifitra an’ity renim-pianakaviana. Efa misokatra ny fanadihadiana ataon’ny mpitandro filaminana mahakasika an’ity fanafihana mitam-basy narahina vono olona ity, ary karohina fatratra hatao hazalambo amin’izao ireo jiolahy, hoy ny vaovao.
Eric Manitrisa
