Tanàna iray ao amin’ny fokontany Amboabary, kaominina Ambalajia, disitrikan’i Maevatanàna no notafihan’ny dahalo, ny alin’ny Alahady lasa teo. Dahalo 40 lahy nirongo basim-borona folo no nanafika tamin’io. Sady nandroba ny omby izy ireo no nanapoaka ny basy hatrany. Vokany : omby dimy vala no lasan’ireo dahalo. Tsy niandry ela ny fokonolona sy ireo jamà mpiandry tanàna roa lahy fa raha vao tafavoaka ny tanàna ireo mpanafika dia nanao ny fanarahan-dia avy hatrany. Tsy lasa lavitra dia nifankatratra tamin’ireo dahalo ka raikitra ny fifampitifirana teo amin’ny roa tonta. Vokany : olona roa no maty tsy tra-drano nandritra izany, ary azon’ireo dahalo ihany koa ny basim-borina roa nampiasan’izy ireo. Tsy nisy azo kosa ny omby, ka mbola mitohy hatrany ny fanarahan-dia ataon’ireo jamà sy ny vatan-dehilahy sasany, raha nanatitra ny razana teny Amboabary kosa ireo olona ambiny.
Ratantely