Ny eo tsy mbola hita ny marina, ny manaraka misosoka ihany, toy izany ny fisehon’ny tranga na asan-jiolahy eto Toamasina . Ao ireo mpitondra fitaovam-piadiana, ao kosa ireo mpanao andiany tsotra ka manao tamba-be mandritra ny asa ratsy fanaon’izy ireo. Raha eo am-pahasitranany ilay mpivarotra tao Valpinson voatifitra teo amin’ny tendany, eo am-pandevenana ilay raim-pianakaviana maty voatifitra tao Tanambao V ny fianakaviany, dia tranga iray hafa koa ny tao amin’ny lalam-pirenena faha-02 – Bis misy ny fandanjana fiara vaventy ao Tanandava, ny alin’ny alarobia nifoha ny alakamisy teo. Mpivarotra entana ilaina amin’ny fiainana andavanandro sy zava-pisotro ity notafihan’ny jiolahy 12 be izao ity. Raha ny fanazavana azo, dia niezaka nanohitra ireto jiolahy ireto ihany noho ny fiarovany ny fananany sy ny fianakaviany ilay raim-pianakaviana, saingy tao anatin’izay dia notifirin’ireo jiolahy ity raim-pianakaviana ity izay bala telo teo amin’ny kibony sy ny tratrany no nahafaty azy. Nihosin-drà tanteraka ny tranon’izy ireo. Naolan’ireto jiolahy ireto nitamba-be kosa ny zanany vavy tsy mbola ampy taona taorian’izay, ary nalain’izy ireo avokoa ny vola sy ny entana tian’ireto jiolahy ireto tao an-trano vao nandeha izy ireo. An-kilan’izay dia mpiasa maraina nisotro kafe tamin’ity mpivarotra iray tao Tanambao V tokony, tamin’ny 6ora maraina koa no nisy nangalatra ny môtôny. Nisy nahita ireo olona naka izany, saingy tsy afa-nihetsika izy ireo noho ireto mpangalatra nanao andiany sy nitondra zava-maranitra. Ankoatra izay dia mampitaraina ireo mpitandro ny filaminana ny baiko midin’ny talen’ny polisy eto Toamasina ; izay mitaky fisamborana velona ireo andian-jiolahy fa tsy mahazo mitifitra intsony ny polisy na mihatra aman’ain’izy ireo aza ny fitaovam-piadiana amin’ireto andian-jiolahy. Ny zava-misy koa dia hatramin’ny nandraisan’ity tale ity ny asany, dia mirongatra ny asan-jiolahy teto Toamasina, ny fakana an-keriny sy ny fanafihana mitam-piadiana ary hatramin’ny asan-dahalo amin’ny halatr’ omby mihitsy ihany koa aza izany.
Malala Didier