Tato anatin’ny iray volana dia nanao tohi-vankana ny fanafihana amin’ny andro atoandro be nanahary amin’ny lalanam-pirenena faha-7 sy ny faha-25. Afak’omaly, fiara iray avy ao Ranomafana Ifanadiana no nosakanan’ny dahalo teo anelanelan’ny Vohiparara sy Ambalakindresy, ka tovovavy kely iray 14 taona no voatifitra teo amin’ny handriny sy teo amin’ny masony havanana. Voavonjy ara-dalana ity zazavavy ity, ka manaraka fitsaboana izy amin’izao, ary tsy ahiana intsony ny ainy, raha ny nambaran’ny dokotera mandray an-tanana ny fitsaboana azy. Noho ny firongatry ny fanafihana fiara ataon’ireo dahalo mpanakan-dalana mitam-basy ao Ambalakindresy, dia mangataka ny hanaovana maika « opération fampandrian-tany » ny mponina sy ireo mpampiasa lalana, satria tamin’ity taona ity fotsiny raha ny tarehi-marika azo, dia efa am-polony ny fanafihana nitranga tamin’io toerana io.
Eric Manitrisa