Nanomboka ny enina aogositra lasa teo no najavona, ka mbola tsy hita popoka hatramin’izao ary tsy fantatra na maty na velona i Misizara Arline, renim-pianakaviana iray 32 taona izay monina any Andranomasibe I Distrikan’i Vohemar. Handeha hividy entana any Sambava no najavona tampoka ity renim-pianakaviana mpivarotra ity. Raha ny fanazavana azo, dia ny tolakandron’ny alahady 5 aogositra lasa teo, tokony tamin’ny efatra ora i Arline no niantso ny rahavaviny izay monina ao Soavinandriana Sambava, ary nilaza izy tamin’izay fa « zaho efa tonga Sambava e, fa rahampitso efa mody raha mahazo entana. » Ary nanafatra mafy an-janany vavy 18 taona an-telefaonina ihany koa ity renim-pianakaviana ity, ary nilafa fa « rahampitso maraina izaho mandalo ao aminareo Antsirabe Nord, ka mety tsy hiaraka isika fa izaho tsy maintsy mandalo ». Nandrasana anefa ny andro alatsinainy io, fa tsy nipoitra i Arline. Nantsoin-janany tamin’ny telefaonina tokony ho tamin’ny 12 ora antoandro mba hanontanana aiza ho aiza ianao izao, nefa samy efa tsy tratra antso intsony ny findainy roa nanomboka teo.
Eric Manitrisa
