Tranga nampalahelo sy nahamenatra no nataon’ireo mitonona ho sendikalista ao amin’ny orinasa Kraomita Malagasy ny tolakandron’ny 23 Janoary 2019 lasa teo , satria nosakanana ny fiara nandehanan’ny mpanao gazety na dia teo amin’ny lalam-pirenena faha- 33 hiditra ny sy mivoaka ny tananan’i Brieville aza no nandehanana ary tsy navela haka sary ireo sakan-dalana nataon’izy ireo fa avy hatrany dia ny fisintonana ny fitaovam-piasana (camera) , sy ompa ary fanambaniana no natao satria nanambara ny sasany fa mpanao gazety sandoka ireo na dia efa nisy famantarana ny fiara nandehanana, ary efa samy nitondra “ Badge” sy akanjo famantarana (Presse) aza ireo mpanao gazety ireto, voasinton’ireo mpanao gazety ihany ny fitaovany satria tsy lavitr’io toerana io no nisy ny mpitandro ny filaminana izay nandray andraikitra avy hatrany ,fa raha tsy izany tsy fantatra ny nahazo ireto mpanao gazety ireto. Araka ny fantatra moa dia namita asa fanangonam-baovao tany amin’ny faritra Brieville sy Manakana iny izay toerana nisian’ny fakana an-keriny ilay mpitsabo mpanampy ireo mpanao gazety telo mirahalahy , dia nijanona tao Brieville rehefa vita ny asa tany Manakana ,ka niandry ny fahatongavan’ny Tale jeneralin’ny Kraomita Malagasy izay hihaona amin’ireo mpitokona ao amin’ity orinasa ity, ny Alakamisy 24 Janoary 2019, kinanjo izao tratry ny herisetra mahatsiravina izao . Miantso ny fandraisana andraikitry ny manampahefana ny rehetra amin’izao tranga izao ary efa nametraka fitarainana teny anivon’ny mpitandro ny filaminana moa ireo mpanao gazety ireo.
Janus R
