Nihena iray indray ireo olon-dratsy mpaka an-keriny. Omaly antoandro, dia nisy iray tamin’izy ireo no fantatra fa lavo tetsy 67ha, raha iny saika hanatanteraka ny asa ratsiny iny. Efa mailo anefa ireo zandary efa nitily ireto andian-jiolahy ireto ka ny azy no lasa aloha.
Tokony ho tamin’ny sivy ora sy sasany maraina tany ho any. Nisahotaka ireo mponina teny amin’iny faritra 67ha iny, ampitan’ny toeram-pivarotana sakafo iray lehibe teny an-toerana, raha nahare poa-basy nanakoako eran’ny tanàna. Feno zandary ihany koa teny an-toerana. Nisy hetsika nataon’ireto farany teny an-toerana, namandrihana andian’olon-dratsy mpaka an-keriny. Somary nanohitra anefa ny iray tamin’izy ireo ka voatery nampiasa ny fitaovam-piadiana teny an-tanany ireto mpitandro filaminana. Raha ny fanazavana azo, dia « fianakaviana efa nanaovan’ireto jiolahy fakana an-keriny taloha no mbola rahonany sy ampitahoriny halaina an-keriny indray raha tsy manome vola fanampiny indray. Noho ny fikaroham-baovao, dia ren’ny zandary io resaka io ka nisy ny fikaroham-baovao sy ny fitsongoanadia ireo nahiana ». Tamin’io maraina io, « dia tonga teny amin’iny faritry 67ha iny tokoa ireto efa noheverina fa jiolahy ireo ary niantso ireo fianakaviany izay nandefa iraka hanatitra kitapo feno vola ho azy ireo. Voamarina arak’izany ny maha jiolahy mpaka an-keriny azy telo lahy ireo ». Niditra an-tsehatra avy hatrany ireo zandary. « Raha iny handray ilay kitapo iny indrindra ilay tovolahy dia nifampitoloman’ny zandary. Tao anatin’izany anefa dia nosintomin’io jiolahy iray io ny basin’ny iray tamin’ireo zandary ireo ». Teo no voatery nitifitra ny sasany tamin’ireo zandary hafa teny an-toerana, « mba tsy hisian’ny loza mety haterak’izany » ka lavo ilay olon-dratsy. Tafaporitsaka kosa ireo namany sasany tao anatin’izany sakoroka rehetra izany. « Mbola tazana nandritra ny fotoana vitsivitsy ihany izy ireo mandra-pisitriny tanteraka, saingy tsy sahy nampiasa ny basiny ny zandary satria aleo namotsotra azy ireny toy izay nandatra na nahafaty olona tsy manan-tsiny » hoy ny fanazavana azo. Mbola mitohy moa araka izany ny fikarohana sy ny fanadihadiana mahakasika ireto andian-jiolahy ataon’ireo zandary. Ilay vola tamin’ny kitapo kosa dia fantatra, fa tsy lasan’ireo olon-dratsy fa naverina soa aman-tsara tany amin’ny tompony.
m.L