Fonja telo sahady izay no efa nitondrana an’i Roger Lala Stéphanie (RLS), voasazy mandra-pahafaty rehefa voarohirohy tamin’ny raharaha fakana an-keriny an’i Annie sy Arnaud. Ireo farany dia ireo zaza tsy ampy taona izay novonoina ny iray voalohany ary notazomina amam-bolana maro kosa ny faharoa ; izay vao avotra. Raha ny fanamarinam-baovao natao, dia naverina teto an-drenivohitra ary notazomina ao amin’ny fonjan’Antanimora avy hatrany i RLS nanomboka ny alatsinainy teo. Zony ny mangataka fifindrana fonja, saingy toa midika ho tsy fahamatorana avy amin’ny mpanapa-kevitra kosa ity famindrana azy in-droa miantoana ity, ao anatin’ny volana vitsivitsy. Na ny fandehanany tany Antsiranana aza dia tsy nisy nahafantatra na ny mpiandry fonja . Izy efa tonga tao an-toerana, naterin’ny mpitandro ny filaminana izay nisahana ny fiarovana, izay vao samy talanjona ny rehetra. Nifandraika rahateo tamin’ny nisian’ny fakàna an-keriny tao Antsiranana ny fahatongavany, ny alin’iny mantsy, dia efa nisy “kidnapping” izay niseho. Vao mainka koa nitodika tany Antsiranana ny maso ary nanara-baovao ny olona no sady nanontany tena raha misy ifandraisany na tsia ny fahatongavan’i RLS tao an-toerana sy ilay kidnapping izay nitranga. Baiko avy amin’ny fitondram-panjakana vaovao no nilatsaka ary namerenana azy etsy Antanimora; izay mety ho fanapahan-kevitra farany tsy hahafahany miova fonja intsony. Toa nenjehina mihitsy mantsy ny fotoana izay mbola tsy nitsanganan’ny fitondrana vaovao mba namindrana azy tany Antsiranana. Kanjo izao naverina eto an-drenivohitra izao indray. Mbola maro ny olona miriaria any kanefa tompon’antoka tamin’ny kidnapping ireo mpianadahy. Misy enina eo izy ireo no mahita miriaria eran’Antananarivo.
D.R