Rongony manodidina ny eo 700 kilao eo, nafatratra tao anaty gony 30 isa no saron’ny zandary avy ao amin’ny « Poste Avancé » Ankaramena, nandritra ny fisavana natao tamin’ny RN7 iny, omaly naraina tokony ho tamin’ny dimy ora, tao Ankaramena distrikan’ Ambalavao Tsienimparihy. Fiarabe mpitatitra solika no fantatra fa nitondra an’ireto zava-mahadomelina marobe ireto, izay nokasaina hoentina hamidy aty Antananarivo. Raha ny vaovao voaray, dia notanan’ny mpitandro filaminana natao fanadihadiana avy hatrany ireo olona telo tao anatin’ity fiara ity. Tao Ihosy moa no nandraisan’izy ireo ny rongony.
Eric Manitrisa
