Nitrangana loza tsy nampoizina tao Ambatomitraka, Distrikan’ Antalaha, ny alakamisy teo, tokony ho tamin’ny 8 ora sy 12 minitra, ka raim-pianakaviana iray 35 taona, fantatry ny maro amin’ny hoe : Iaban’ny Pongany no maty tampoka teny an-tanimbary niasany. Tamin’ny enina ora naraina no niala tao an-tranony tao Andripitra, Fokontany Tanambaonampano ity lehilahy namoy ny ainy. Ary tamin’ny fito ora izy no nanomboka niasa teny an-tanimbary, ary taorian’izany dia nitolefika irery tsy tafatsangana intsony.
Raha ny vaovao voaray, dia mpanao trano (maçon) no tena anton’asan’ity raim-pianakaviana manambady aman-janaka avy any amin’ny Fokontany Antsahono, Kaominina ambanivohitra Ambodimanga, any amin’ny Distrikan’ Andapa ity, izay mila ravinahitra ao Antalaha. Nefa noho ny tsy fisian’asa dia voatery niasa teny an-tanimbary izy tamin’io andro io, ka izao nindaosin’ny fahafatesana tampoka izao. Raha ny voalazan’ny vady navelan’ny maty, izay mpivarotra anana, dia taizan’ny aretim-bavony rangahy vadiny ary manao « crise » matetika, nefa noho ny tsy fisiam-bola dia tsy afaka mitsabo tena izy ireo.
Eric Manitrisa