Nisehoana fanafihana mitam-piadiana indray tao atsinanan’i Betafo ny alin’ny zoma faha 6 jona teo . Tsy mbola mifanalavitra loatra amin’ny renivohitry ny kaominina no nisian’izany. Lasibatr’ireo dahalo tamin’izany ny ombin’i Ranto ( omby mbola hamidy) 80 teo ho eo. Nitabataba sy nanapoaka basy ireo dahalo vao tafiditra ny tanana, tsy fantatra mazava hatreto ny isany . Noraofiny avokoa ireo omby saika mbola hamidy. Tsy nisy sahy nivoaka ny mponina raha tsy efa nilamindamina ny fanafihana. Tsy niandry ela koa fa nanao ny fanarahan-dia avy hatrany ny fokonolona niaraka tamin’ny zandary tao an-toerana. Tsy lasa alavitra dia efa narian’ireo jiolahy teny an-dalana ny sasan-tsasany tamin’ireo omby. Raikitra ny fifandonana, vaky nandositra avokoa ireo jiolahy ary navelany tao Bemaha ny omby rehetra. Tafaverina tamin’ny tompony avokoa noho izany ireo omby rehetra.
Andry N.
