Dingana iray lehibe tsy maintsy atrehan’ny tovolahy feno sivy ambin’ny folo 19 ka hatramin’ny iraika ambin’ny telopolo (31) taona ny fiatrehana ny fitsarana miaramila. Ny fananana ny karatra maitso izay omena ho fanamarinana ny nahavitana izany dia vavahady hidirana amin’ireo sampan’asam-panjakana rehetra, sy ny fikirakarana taratasy hivoahana ivelan’ny Nosy. Izay ny eo amin’ny fitsarana miaramila fa ny fanompoam-pirenena dia safidy, ka ho an’ireo manana faniriana te hanao ny fanopoam-pirenena dia afaka manantona avy hatrany ny tompon’andraikitra mahakasika an’izany. Ny Distrikan’Andilamena no nanombohana an’izany fitsarana miaramila izany ny alakamisy faha 1 Aogositra 2019 ary nisy ihany koa ny fanisana ireo zatovolahy feno taona izay ho tanterahina mandritra ny roa volana. 606 no voatsara ary 673 no voaisa, nanokatra izany tany an-toerana ny Jeneraly Rasolonirina Roger Talen’ny DSNGR na Fitalenan’ny Fanompoam-pirenena sy Fiandry. Nifanindran-dalana tamin’io fotoana io ihany koa ny asa sosialy ny fitsaboana maimaim-poana toy ny nify sy ny aty vava, ary ny didi-paotra faobe nataon’ny Ministeran’ny Fiarovam-Pirenena izay notarihin’ny Médecin General Rasamimanana Lysias Tale Jeneralin’ny sampan’asa miadidy ny sosialy sy ny fahasamana eo anivon’ny Tafika Malagasy. Tanjona amin’izao hetsika ara-tsosialy ny fanakaikaizan’ny Foloalindahy ny vahoaka mba hanamafisana ny fahatokisan’ny vahoaka azy ireo.
T.M.
