Amin’izao fotoana izao dia fantatra araka ny vaovao voaray avy any an-toerana fa efa misy olona telo ahiana ho anisan’ireo jiolahy miisa 18 nanafika fivarotana iray tao Andranovelona Ambatolampy, nohenoin’ny mpitandro filaminana any an-toerana. Tamin’ny faran’ny herinandro lasa teo no niseho ity fanafihana ity. Avy hatrany, raha vao lasa nandositra ireo mpandroba dia nahazo fampandrenesana ny zandary. Tonga teny amin’ilay toerana ry zareo. Efa lasa anefa ireo jiolahy tamin’izay. Niroso tamin’ny fanadihadiana ireo mpitandro filaminana ka nahitana vokany izany. Avy amin’ny famotorana ihany no nahalalana fa miisa hatrany amin’ny 18 any ireo jiolahy tamin’io alina io. Efa tamin’ny 9 ora tamin’izay. Tsy nivarotra intsony ireo tompon’ny tsena. Novakian’ireo mpandroba ny varavarana ary dia teo izy no niditra. Voahambana basy avy hatrany ny tompony. Tsy nisy azo natao tamin’izay fa dia nanaraka izay nolazain’ireo mpandroba. Soa aloha fa tsy nisy ny olona naratra. Tamin’io fotoana io no nahalasanan’ny vola 10 tapitrisa ariary tao amin’ilay fivarotana. Toa tsy nisy nahare ny fandrobana moa ny manodidina ka dia nanaram-po tsy nisy ohatran’izany ry zalahy. Rehefa azony izany dia lasa izy ireo ary teny am-pandosirana dia nanapoka basy. Izany dia ny mba hampitahorana ireo mety ho sahy hanaraka na hanenjika azy.
r.s.
