Nilomano ary maty nalentiky ny rano. Tovolahy iray 23 taona izay nanao vakansy tao Antsanitia-Mahajanga no niharan’izany. Ny zoma teo no nitranga izany teo amoron-dranomasina. Raha ny fanamarihana azo dia mpiala sasatra avy any an-drenivohitra io niharan-doza. Ny ampitson’iny, izany hoe ny asabotsy tokony ho tamin’ny dimy ora maraina, vao hita natsingevan’ny rano ny razana na teo aza ny fikarohana isan-karazany izay natao teo an-toerana. Isan’ny nohazavain’ny tompon-tany ny tsy tokony hininanana kisoa izay fady eo amin’ny manodidina ity toeram-pialan-tsasatra izay isan’ny mahasarika ny mpivahiny ity. Nanentana ny olona ny mba hanajàna ny fady raha hilalao ranomasina, indrindra ho an’ireo vahiny. Tsy voalohany no nisy loza an-dranomasina nitranga tao Mahajanga ary nahafaty ireo mpiala sasatra na mpanao « voyage d’études ». Voaresaka matetika ho mety ho anton’ny loza ny tsy fanajàna ny fady. Raha ny fijery ara-tsiantifika indray anefa dia ny fisian’ny lavaka tampoka anaty ranomasina ary miteraka fifampisintoman’ny rano no mitarika ny olona amin’ny filentehana. Azo heverina ny hanasiana mpanara-maso ny sisin-dranomasina izay betsaka olona mba hiarovana ny ain’ny mpiala sasatra.
D.R
