Nisy naka an-keriny ve sa nisy namono kosa? Tsy nisy hita ireo olona efatra, izay ny hitovizany dia samy mpandraharaha. Ny roa dia nandeha hividy akanjo « friperie » iray kaontenera, kinanjo tsy hita niaraka tamin’ny vola hatramin’izao rehefa namonjy ny fotoana momba ny varotra. Vehivavy roa ny voakasik’izany ary efa hatramin’ny volana jolay ireo no nanjavona tsy hita. Taorian’izay indray dia nisy roa hafa koa, lehilahy indray ireo, nividy lafarinina an-taoniny maro. Efa nitondra ny vola hividianana an’izany ka namonjy fotoana nifanaovana tamin’ny mpivarotra. Kinanjo nanjavona ihany koa taorian’izay. Mandeha avokoa ankehitriny ny fikarohana an’ireo olona ireo sy ny fanadihadiana mifandraika amin’izany. Mbola manampy ny lisitry ny olona tsy hita hatramin’izao, ao Toamasina, ny anaran’i Owne Alek, ilay teratany karàna izay nisy naka an-keriny. Ny nahagaga dia nifanesy ary saika nitovitovy avokoa ny fotoana nisehoan’ireo fanjavonana ireo. Ny tena hitovizany dia samy tamin’ny volana jolay…
D.R
