« Anjara hetrako ho fampandrosoana ny tananako » io no teny filamatra nentin’ny sampandraharahan’ny hetra nanatanteraka ny hetsika iray lehibe nanentanana ireo mpandraharaha na mpanao fihariana majinika hiditra amin’ny sehatra ara dalàna (secteur formel) amin’ny fandoavan-ketra. Nohamoraina tanteraka ny fomba fandoavan-ketra sy ny fepetra hahazoana ilay karatra, « carte fiscale ». Raha tsiahivina dia taratasy fanamarinam-ponenana sy dika mitovy amin’ny kara-pandro miaraka amin’ny vola ariary 16000 dia afahana mahazo ny « carte fiscal » eo noho eo. Fahombiazana, izay no azo amehezana azy raha teto Antsirabe sy ny manodidina no resahina hoy Raelison Bary Lalao, lehiben’ny sampandraharahan’ny hetra mpisolo toerana eto Vakinankaratra, nisy rahateo ny fiaraha-mientan’ny mpiasan’ny hetra hoy ny fanazavany.
Raha 1000 no tanjona nokendrana ho an’ireo mpadoha hetra vaovao dia nihoatra lavitra noho izany tratra nandritra izay efatra andro nanaovana ny hetsika izay. Navitrika ny olona fa na andro tsy fiasana aza ny Alakamisy lasa teo dia maro ny olona nanefa ny adidiny. Mbola hitohy ny hetsika ka fantatra fa hiazo an’Ambohimandroso sy Ambatolampy indray ny sampandraharahan’ny hetra eto Vakinankaratra. Hisy kosa ny fitetezam-paritra hataon’ny ekipan’ny Foibem-pitantanana ankapobean’ny Hetra (DGI) eto amin’ny Nosy.
Andry N.
