Fararanon-danonana tokoa ny tao amin’ny Nosy Ste Marie, faritra Analanjirofo ny faran’ny herinandro lasa teo. Ankoatry ny fitsidihan’ny Filoham-pirenena tany an-toerana, nitokana ireo fotodrafitrasa marobe mantsy dia niavaka ihany koa ny fetin’ny “zagnaharibe” na ny “Baleine” tamin’ity taona ity. Niavaka satria dia tonga nijery izany nivantana ny Filoham-pirenana Andry Rajoelina, niaraka tamin’ny Governoran’ny faritra, ny Dr Randrimanantena Marcellin, niaraka tamin’ireo olo-manan-kaja maro tonga tany an-toerana. Mahaliana tokoa ny fahitana ireto trozona ireto ary harena sarobidy sy tombony ho an’ny Faritra Analanjirofo indrindra i Sainte Marie ny fisian’izany. Mpizahantany maro, avy eto an-toerana sy avy any ivelany no efa any an-toerana sy mbola handrasana noho izany. Marihana fa manomboka ny volana Jona ka hatramin’ny Septambra eo no hamangian’ireto trozona ireto ny fari-dranomasin’i Ste Marie, ary tamin’ity taona ity dia nahatratra an’arivony any ho any izy ireo no tonga.
Manara-penitra. Fa ankoatr’izay fetin’ny “baleine” izay dia fotodrafitrasa marobe ihany koa no natsangana tany an-toerana, ho fanantanterahana ireo velirano napetraky ny Filoham-pirenana. Tao anatin’izany ny trano manara-penitra, hisy ny biraon’ny filaminam-bahoaka, ny Lapan’ny Fitsaràna vaovao, ary ny Tranoben’ny Fizahantany, izay niaraka tamin’ireo lalana navaozina sy nasiana rarivato. Ny Filoham-pirenena mihitsy moa no tonga nitokana izany tany an-toerana. Nanotrona azy ireo mpikambana maromaro teo anivon’ny Governemanta, ireo Governora telo miralahy ao anatin’ny faritanin’i Toamasina dia Analanjirofo, Atsinanana ary Alaotra Mangoro, niaraka tamin’ireo tompon’andraikim-panjakana isan-tsokajiny tany an-toerana. Faly tokoa ny vahoakan’ny Sainte Marie. Nandray fitenanana nisolo tena azy ireo moa ny Governoran’Analanjirofo, izay tsy nitsahatra nisaotra ny Filoham-pirenana, noho izao fotodrafitrasa manara-penitra hisatrahan’izy ireo izao.
m.L
