Nahitana vokatra tokoa hatreto ny ezaka samihafa ataon’ny eo anivon’ny polisim-pirenena hanafoanana ireo asa ratsin’ireo tontakely sy mpanao sinto-mahery ary mpamaky trano eto an-drenivohitra. Araka ny fantatra dia tsy mitsahatra mamorona paikady isan’andro izy ireo mpitandro filaminana manolona ireo tranga maro samihafa matetika miseho sy heno eny anivon’ny fiarahamonina eny. Isan’ny vokatra azo tamin’izany ny fahatraran’ny polisy miasa ao amin’ny PPA Antaniavo tovolahy iray vao 23 taona izay tratra ambodiomby nangalatra vata fahitalavitra teny Ankazomanga Atsimo ny 18 Novambra 2022 lasa teo tokony ho tamin’ny 6 ora hariva. Fisafoana nataon’ireo polisy manao fanamiana sivily no nahatrarana ity tovolahy ity. Nosamborina avy hatrany ity farany ka nanaovanana ny fanadihadiana. Niaiky ny heloka vitany ity mpangalatra ity. Taorian’ny famotorana sy ny nitondrana azy teny amin’ny Fampanoavana dia naiditra am-ponja vonjy maika eny Antanimora ny tovolahy.
T.M.
