Iny an-dalana handeha hamonjy ny biraon’ny pôlisy iny no nanapa-kevitry ny hitsoaka teo am-pelan-tanan’ireo mpisambotra azy ity tovolahy iray 19 taona, voarohirohy tamin’ny resaka halatr’omby. Voatery nitifitra ireo pôlisy.
Tao amin’ny fokontany iray antsoina hoe, Andranoteraka any amin’iny faritra Menabe iny no nitrangan’izany, omaly alakamisy, tokony ho tamin’ny valo ora maraina. Araka ny fantatra dia nitrangana halatr’omby nifanesisesy tao amin’ity fokontany ity. Voatonona matetika amin’izany, ilay tovolahy, raha ny fanazavana azo avy amin’ny pôlisim-pirenena. Nisy araka izany ny hetsika nataon’ny teo anivon’ny fitaleavam-paritry ny pôlisy, nisamborana izany dahalo rain-dahiny izany, tany an-toerana. Omaly maraina no nidina tany ireo mpitandro filaminana. Taorian’ny velam-pandrika nataon’izy ireo no tsy afa-niala intsony tamin’ireto pôlisy ilay tovolahy. Tra-tehaka ary voasambotra soa aman-tsara. Nentina avy hatrany nihazon’ny biraon’ny pôlisy tany an-toerana. Kanjo, « teny an-dalana hamonjy ny birao no nanao tari-dositra ity tovolahy ity,nisy ny tifitra fampitandremana nataon’ireo polisy saingy nanohy ny diany foana ny lehilahy » hoy ny fampitam-baovao azo. Niezaka nanenjika ihany anefa ireto mpitandro filaminana. « Voatery nitifitra izy ireo ka lavon’ny bala ity mpangalatra ity tamin’ny 12h30 tao amin’ny fokontany Andranoteraka » hoy hatrany ny fanazavana.
Taorian’ny fitsirihana ny razana moa ny nomena ny fokonolona ny vatana mangatsiakan’ity voalaza fa olon-dratsy ity, ho amin’ny fandevenana azy. Mitohy tsy an-kijanona kosa, raha ny voalaza hatrany ny fanadihadiana sy ny fikarohana izay mety ho namany. « Misy hatrany ny ezaka atao hanafoana ny halatr’omby tahaka izao »
m.L
