Nifampitifitra ny zandary sy ny jiolahy tany ambanivohitr’i Behenjy. Maty tsy tsa-drano ny iray tamin’ireo olon-dratsy raha tafaporitsaka kosa ny ambiny. Rehefa narahina ny dian’izy ireo dia hita ny akanjo mihosin-drà. Na izany aza anefa dia tsy hita tao anatin’ny haizina izay nanjavonan’ireo jiolahy izay vao avy nanafika. Omaly kosa dia nitohy ny fanangonam-baovao nataon’ny zandary misahana ny faritr’i Vakinankaratra. Fantatra ny fisian’ny olona mampiahiahy izay nitsabo tena tao amin’ny hopitaly iray teto an-drenivohitra. Rehefa izany dia natao ny fanamarinana ary tena tao tokoa ilay jiolahy izay noraisim-potsiny. Tsy afa-niala tao amin’ny hopitaly izy noho ny fahavoazany izay mila manao « pansement » matetika. Amin’ny maha-olona dia notohizana ihany ny fitsaboana azy ary efa nanomboka ny fanadihadiana.
D.R
