Efa avy nahafaty olona tao amin’ny fokontany Ambaniandrefana, tao Ihosy ireto andian-jiolahy ireo, nandritry ny fanafihana mitam-piadiana nataon’izy ireo, ny faran’ny volana jona lasa teo. Mbola nisy omby tsy azon’izy ireo anefa ka nokasain’izy ireo hiverenana, ny faran’ny herinandro teo. Efa ireo pôlisy anefa no nitsena ireto farany. Nisy ny fifandonana. Raha ny fampitam-baovao avy amin’ny pôlisim-pirenena dia jiolahy mpangalatra omby iray no lavon’ny balan’ny pôlisy nandritry ny fifampitifirana nitranga tao amin’ny fokontanin’Iaborano, any amin’iny distrikan’Ihosy iny. Tamin’io fotoana io mantsy dia nahazo antso ireo pôlisy avy eo anivon’ny Fitaleavam-paritry ny pôlisy ao Ihorombe, fa misy olona mampiahiahy, mirongo basy tao amin’io tanana io. Nidina avy hatrany tany an-toerana ireo pôlisy ary nametraka ny paik’ady rehetra, hisamborana azy ireo. Fantatra mantsy fa miisa dimy izy ireo ary samy mirongo fitaovam-piadiana avokoa. « 10 km tsy idirana an’Ihosy, rehefa nahatazana ny Polisy ireto jiolahy tonga dia nitifitra avy hatrany. Namaly izany koa ny Polisy, vokany jiolahy iray no lavo, roa kosa azo velona niaraka tamin’ny basy ary ny roa ambiny lasa nirifatra nitsoaka. Mbola eo ampikarohana azy ireo ny Polisy » hoy ny vaovao azo. Andian’olona, izay toa efa tsy zoviana tamin’ireo mponina intsony ireto farany, antony niantsoan’izy ireo mpitandro filaminana. Raha ny voalaza mantsy dia isan’ireo nanafika tao Ambaniandrefana, ny faran’ny vola jona lasa teo izy ireo. Fanafihana izay tsy nahazon’izy ireo omby noho ny fahatongavan’ireo pôlisy ara-potoana, saingy indrisy fa namoizana ain’olona. Ny hikasa hiverina haka an’ireo omby tao an-tanana no masaka tao an-tsain’ireo jiolahy, saingy dia mbola izao nandamoka izao indray.
m.L
