Tsy lasa lavitra dia efa voahodidina ireto olon-dratsy. Ny iray tratra, ny hafa tafaporitsaka.
Ny alin’ny zoma hifoha sabotsy lasa teo, nihorohoro tanteraka ny mponina tao amin’ny tanàna antsoina hoe Ankaditehana, ao amin’ny fokontany Avarabohitra, kaominina Ampefy, distrikan’Analavory. Andian-jiolahy maromaro, nirongo zava-maranitra no tonga nanafika ity tanàna ity, nanakotaba ny rehetra tamin’ny alalan’ny feon-kiririoka sy horakoraka. Mazava ho azy fa noho ny tahotra dia tsy nisy sahy nivoaka ny mponina ary nivalaketraka niandry izay zava-nisy. Tamin’io fotoana io, araka ny angom-baovao azo, dia tokantrano anankiroa tao an-toerana no nidiran’ireto olon-dratsy. Ny iray, araka ny fampitam-baovao, dia nahazoan’izy ireo vola manodidina ny dimy alina sy efatra hetsy teo, niaraka tamin’ny finday telo. Ny faharoa kosa, nahazoan’izy ireo entam-barotra maromaro sy zava-pisotro. Nisy tamin’ireo mponina ihany anefa no nampandre avy hatrany zandary vantany vao tonga ireto dahalo ireto. Nandray an-tanana avy hatrany raharaha ary tonga teny an-toerana tao anatin’ny fotoana fohy kosa ireo zandary. Raikitra ny fifanenjehana. Efa teo am-pitsoahana moa ry zalahy mpanafika tamin’io fotoana io. Tsy lasa lavitra, hoy ny fampitam-baovao avy amin’ny zandary, dia voasambotra ny iray tamin’ireo mpanafika, izay mbola nahitàna ilay finday sy zava-pisotro avy nangalarina teny aminy. Mbola eo am-panaovana hazalambo ireo tafatsoaka ny zandary any an-toerana amin’izao. Ity tratra ity kosa, efa nentina nihazo ny birao, notanana natao andrimaso ho amin’ny famotorana azy.
m.L
