Teo anoloan’ny biraom-pifidianana mihitsy no nandalo ireo andian-dahalo vao avy nangalatra omby ary niaraka tamin’ny fitaovam-piadiana isan-karazany. Nifanintsy tamin’ny andron’ny fifidianana izany ary dia raiki-tahotra ny olona omaly tao amin’ny fokontany Bemahatazana-Miandrivazo. Nohidina faran’izay haingana ilay biraom-pifidianana ary nijanona aloha ny filaharana, satria samy namonjy ny ainy niala teo an-toerana ny mpifidy. Nantsoina ny zandary tao an-toerana ary nanao ny fanarahan-dia. Efa dify lavitra ny dahalo ary efa nanao ny fanenjehana ny mpitandro ny filaminana izay vao nisy ny fanapahan-kevitra ny namerina tamin’ny laoniny ny fandatsaham-bato. Toe-javatra toy izany no mbola misy amin’izao vanim-potoana iainantsika izao. Ao anatin’ny toerana izay tena tandrovina no nisy olon-dratsy manao andiany nandalo. Tsy nikasa ny hamaky biraom-pifidiana izy ireo fa kosa lalany fotsiny no nizorany. Na izany aza, ao anatin’ny fanahiana sakoroka dia avy hatrany dia nikorontana ny sain’ny olona ka niala teo an-toerana sy nanidy ny efitra fandatsaham-bato. Soa fa mba niverina ihany ny filaminana taorian’izay rehefa tsy nisy ny herisetra niseho.
D.R
