Vehivavy roa mba handeha hamonjy vavaka maraina no voaendaka omaly. Nipitrapitra fotsiny sisa izy roa ary tsy nisy navelan’ireo jiolahy intsony hatramin’ny rakitra saika harotsaka ao am-piangonana. Miverina mirongatra indray ny sinto-mahery eo Ankadifotsy-Ambatomitsangana raha araka ny fanazavan’ny mponina eo an-toerana. Ny vao maraina dia ireo mpiasa hamonjy fiara fitaterana no tena hataon’ireo lasibatra. Manodidina ny telo ka hatramin’ny efatra eo hatrany no isan’ny mpandroba ary miditra elakelan-trano raha vao mahavita ny asaratsiny. Mitondra antsy lava ireo ary matetika afeniny ao anaty tanan’akanjo izany. Efa nisy fisamborana mafy izay nataon’ny mpitandro ny filaminana ihany teo an-toerana rehefa nisesy ny sinto-mahery ataon’ireo olon-dratsy. Izao anefa dia efa miverina indray ny fanendahana isan-karazany ary mampihorohoro ny mponina eo an-toerana sy izay tsy maintsy mandalo eo Ankadifotsy koa amin’ny fiainana.
D.R
