Marina tokoa fa hoe ahitana ny zavatra rehetra ilaina andavanandro ireny « epicerie » ireny, saingy ny an’ity lehilahy ity kosa efa mihoatra ny fefy ! Ankoatr ireo entam-barotra maro isan-karazany mahazatra mantsy dia mbola nampiany fivarotana rongony maina ny azy, ary io no tena ifantohany betsaka, hoy ny fampitam-baovao. Tranga niseho tao amin’ny fokontany iray tao Ambilobe tao. Ny zoma lasa teo no nanao bemidina tao amin’ny fokontany Laidama ny zandary tao an-toerana, rehefa nahazo angom-baovao ny amin’ny fisian’ny « épicerie » rongony tao an-toerana. Vao nahare ny vaovao ireo zandary dia nanao ny vela-pandrika rehetra, hisamborana ny tompon’izany tranombarotra izany ambodiomby.Ny hariva, amin’ny fotoana nahabe olona iny mihitsy no nitsofoka tao amin’ilay fivarotana ireo mpitandro filaminana ary tsy afa-niala intsony ny lehilahy. « Varotra rongony no tena ataon’ity farany, saingymody mialokaloka ao amin’ny fanaovana « épicérie » izy », hoy ny fampitam-baovao azo hatrany. Marihaina fa tamin’ny fotoana nisamborana ity farany dia voalaza fa mbola nahitana rongony maina am-polony kilao tao an-tsenany. Nentina avy hatrany nihazo ny biraon’ny zandary mba hatao famotorana moa ity lehilahy ity taorian’ny nisamborana azy. Tsy any ihany fa na eto an-drenivohitra aza dia maro tokoa ireo olona no mialokaloka ao ambadiky ny fitadiavana ara-dalàna iray, entina manafina ny bizina rongony ataony. Samy nahatadidy ny rehetra amin’ny fisian’ireo vehivavy mody mivarotra hani-masaka kanefa sady mivarotra rongony ihany, ary voasambotry ny mpitandro filaminana. Tsapa ihany koa tao ho ao izay fa tsy mihanona fotsiny amin’ny fivarotana izany zava-mahadomelina voarara izany ny sasantsany amin’ireo olona fa miroso amin’ny fambolena mihitsy. Ny farany teo, fototra maromaro no tra-tehaky ny zandary tao amin’ny tokantrano iray teny amin’iny faritra Itaosy iny. Lehilahy iray 52 taona no voatery nosamborina sy notanana natao andrimaso.
m.L
