Mitombo foana aloha hatreto ny voasambotra. Asakasak’ireo izay mbola hanohy! Omaly, lehilahy mpanendaka anaty taxibe iray indray no voapaingotry ny polisy avy etsy amin’ny kaomisarian’ny boriborintany faharoa, teny amin’iny faritra Ambohijatovo. Araka ny fantatra dia tratra ambodiomby teo am-panendahana mpandeha iray tao anaty fiara mpitatitra manao zotra 184 ny lehilahy. Finday anankiray no azony teny amin’ity mpandeha ity. Avy hatrany moa dia niantso vonjy ity lasibatra ary niray hina avy hatrany ireo mpandeha rehetra tao anaty fiara. Nikasa ny handeha hidina ny fiara ihany ranamana saingy notazomin’ireo olona tsy navelany hivoaka ny taxibe. Niantsoana polisy avy hatrany moa ingahirainy ary natolotra ireto farany nony avy eo. “Noentina niazo ny biraon’ny Polisy teny Ambohijatovo ity lehilahy ity mba ho atao fanadihadiana” hoy ny vaovao azo. Mbola maro ireo tontakely no miriaria sy manohy manao ny asa ratsiny anatin’ireny fiara fitanteram-bahoaka ireny, raha tsy hiteny fotsony afa-tsy eny amin’iny faritra Anosibe sy ny manodidina, ny eny 67ha, ny eny Andavamamba. Misy ireo manao andiany, ary misy ireo mandeha tsirairay. Mazàna fantatr’ireo mpanampin’ny mpamily tsara izy ireny saingy tsy misy sahy miteny izy ireny noho ny tahotra. Ireo tontakely mantsy, tsy menatry ny handratra sy hamono mihitsy.
m.L
