Raha ny fanazavana azo dia efa nanomboka ny 11 martsa teo ny fisoratana anarana ho an’ireo izay mila fandidiana eo anivon’ny sambo “Mercy ships” tonga eto Toamasina. Eo anivon’ny hopitaly maranapenitra sy hopitaly be ary ireo ivon-toerana fitsaboana samy hafa no ahafahana misoratra anarana amin’izany. Fandidiana karazany efatra no ataon’izy ireo mandritra ny fandidiana atao ny volana jona ho avy izao, satria ny fizahana ny marary atao ny volana may ho avy io. Ka raha ny fanazavana dia ny momba ny molotra samba na sima, ny olana amin’ny maso fotsy na “cataracte”, ny olana amin’ny tongotra miolana na “pied beau”, ary ny tsy fahasalamana amin’ny tenda na “goitre” no hodidian’izy ireo mandritra izany fitsaboana izany. Hatreto aloha tsy fantatra mazava ny olona hodidiany fa araka ny voalaza dia tsy misy fetrany izany fandidiana izany, ka hahatratra 1.500 no hahazo fandidiana amin’izany. Araka ny fanazavana dia teratany vahiny avy amin’ny firenena 35 samy hafa no miasa ao anatin’ilay sambo “Mercy ships”. Izy ireo no miantoka ny fitaterana ny marary sy ny fampiantranoana azy mandritra izany, ka ireo avy amin’ny toerana lavitra aza dia hisy ny angidimby hampiasaina mandritra izany amin’ny fandidiana atao eto Toamasina.
Malala Didier
