Maevatanàna : Mpitondra môtô nandona olona, nitsoaka

Ny marainan’ny Zoma faha 17 May 2024 teo, tokony ho tamin’ny 12 ora sy sasany antoandro no nampandre ny Zandary ao amin’ny borigady Andriba ny filoham-pokontan’i Kamolandy, any kaominina Andriba, ato anatin’ny disitrikan’i Maevatanàna, fa nisy mpitondra môtô iray, nandona mpandeha an-tongotra fantatra amin’ny anarana hoe: Rasoarimanana Blandine, eo amin’ny 40 taona eo, ka nitsoaka nandositra nalaky ilay lehilahy nitondra kodiarandroa, rehefa hitany nitsirara tamin’ny tany ny Ramatoa voadonany. Taorian’izay no nanao sakana tamin’ny lalam-pirenena fahefatra, teo amin’ny PK 193+700 ireo ekipan’ny Zandary avy ao amin’ny Poste Avancé Mahatsinjo, ka nitarika ny fisamborana an’ilay mpamily antsoina hoe: Jean Richard, tokony 36 taona eo, izay monina any Andoharanofotsy/Antananarivo. Rehefa nentina tao amin’ny biraon’ny Zandary ao Andriba ny navanon-doza, dia niaiky ity farany, fa nandona olona teny amin’ny toerana voalaza etsy ambony. Tsy niandry ela ny Zandary fa nosamborina sy notanana ao am-ponja vonjimaika ilay meloka no efa nampandrenesina ihany koa ny fianakavian’ny niharam-boina, ka ny borigadin’Andriba no misahana ny famotorana. Efa nahazo fitsaboana sahaza ao amin’ny CSB I Andriba kosa ilay Ramatoa voadonan’ny môtô no tsy misy hatahorana ihany koa ny ainy. Marihina fa avy any avaratra hianatsimo hamonjy fiodiana any Antananarivo moa ilay mpitondra môtô.

Ratantely