Hita avokoa ny razana rehefa nokarohina hatramin’ny ny faran’ny herinandro teo. Valo mianaka izy ireo no nalentiky ny rano rehefa rendrika ny lakana nitatitra, ny harivan’ny alakamisy teo. Ny dimy no hita voalohany ny ampitson’iny ary roa andro taty aoriana vao natsingevan’ny rano ny telo hafa izay nisy zazakely. Avy any amin’ny tanàna antsoina hoe Anoronoro ireo olona ary saika hihazo an’Ambatosoratra no io niharan’ny loza an-dranomamy io. Nandrasana tao amin’ny tranom-pokonolona ireo hita voalohany ary tena ontsa ny olona nahita ireo mpianakavy. Isan’ny fitaovam-pitaterana tena miasa ho an’ireo mponina eo amin’ny manodidina ny farihin’Alaotra. Izany dia ankoatry ny fampiasana lakana amin’ny fanjonoana izay iveloman’ny tokantrano maro. Ny tranga toa itony dia tokony hangalàna lesona mba tsy hiverimberenan’ny loza. Isan’ny voalohany tokony hodinihina dia ny mba hahafantaran’ny mpiandriaka ny toetry ny andro ka hahafahany manapa-kevitra ny amin’ny tokony hanetsehana na tsia ny lakana.
D.R
