Mandry tsy lavo loha ny mponina ! Nanomboka ny harivan’ny sabotsy teo, tokony ho tamin’ny fito ora sy sasany tany ho any no maizina tanteraka, tapaka ary tsy niverina ny jiro teny an-toerana, hatramin’ny fotoana nanoratanay omaly. Ny teo anivon’ny Jirama moa, raha nantsoina (ny sampana mpikarakaraka ny mpanjifa ao amin’ny 547) dia nilaza tsy taitra fotsiny fa « efa betsaka ianareo no miantso mahakasika azy io fa hampitaina amin’ireo tompon’andraikitra ». Hatramin’ny omaly hariva anefa, tsy mbola nisy « intervention » na famerenena ny jiro teny an-toerana.
Efa imbetsaka
Tsy vao izao io fahatapahan-jiro maharitra andro iray mahery eny an-toerana fa efa imbetsaka ihany, ary matetika mitranga izany ny faran’ny herinandro, raha ny voalazan’ny mponina. « Izany dia noho ny fisian’ny « disjoncteur » iray eo akaikin’ny Orinasa Akanjo eo, izay mipika lava. Efa antitra na amboarina na mila soloina mihitsy fa tsy mahazaka ny filàn’ny mponina ety». Raha ny fantatra dia olana mateti-pitranga efa fantatry ny eo anivon’ny Jirama izy io, saingy hatreto dia tsy mbola nisy fandraisana andraikitra na vahaolana naroson’izy ireo mahakasika izany.
Tsy fandriam-pahalemana
Etsy andanin’izay, iahara-mahalala ihany koa fa anisan’ny faritra mena ao anatin’ny resaka tsy – iny faritra Ambatomaro, ao anatin’ny boriborintany fahadimy iny. Raha tsy hiteny fotsiny afa-tsy ny firongatry ny sinto-mahery, hala-botry ary fanendahana mitam-piadiana, tao ho ao izay. Efa manao izay azony atao ireo mpitandro filaminana mandrava ireo andian-jiolahy sy tontakely ireo kanefa, mazava ho azy, fa ny haizina manjaka eny an-toerana dia vao mainka mampirisika ireto farany hanao ny asa ratsy. Hany ka lasa miaina ao anatin’ny tebiteby lava ireo mponina, ankoatra ny fikatsoan’ny asa aman-draharaha rehetra. Dia izany hoe, lasa sorona foana ny vahoaka. Ao anatin’izay anefa, ny vidin-jiro tsy maintsy efaina ihany.
m.L