Handeha hisongona fiara teo alohany tao anaty fiolanana ity fiara tsy mataho-dalana ity ary nifatratra teny amin’ny tamboho tamin’iny sisin-dalana iny. Olona iray tao anatiny no fantatra fa naratra vokatr’izay, ary nentina nihazo tobim-pahasalamana. Loza niseho tetsy amin’ny lalam-pirenena faharoa, teo amin’ny toerana antsoina hoe Zazamaditra, fokontany Ambatofotsy, kaominina Ambohimalaza, ny alakamisy teo, tokony ho tamin’ny folo ora sy sasany tany ho any.
Raha ny fampitam-baovao azo dia fiara 4×4 marika Mitsubishi, eo anivon’ny minsiteran’ny Rano ity niharan-doza ity. Avy aty Antananarivo handeha ho any Ambatolampikely. Ankevitry ny nandeha mafy ihany ilay fiara ary nikasa ny hisongona taxi-brousse iray teo alohany, tao anaty fiolanana. Tsy fantatra anefa izay tena zava-nitranga fa nirefotra tampoka teo ny kodiarana aoriana ankavia. Tsy voafehin’ny mpamily intsony araka izany ny familiana ilay fiara ary io namarana ny lalany teny amin’ny tamboho tamin’ny sisin-dalana io ilay fiara. Mafimafy ihany ny dona satria simba tanteraka ny lohan’ny fiara, hoy ny vaovao azo. Vehivavy 38 taona, isan’ireo mpandeha tao anatin’ity fiara tsy mataho-dalana ity no naratra vokatr’izay. Saingy raha ny fampitam-baovao azo dia efa tsy misy ahiana ny ainy, noho ny famonjena haingana nataon’ireo zandary teny an-toerana. Ireto farany izay tonga avy hatrany teny an-toerana taorian’ny loza, nijery ifotony ny zava-nisy sy nanokatra ny fanadihadiana teo no eo.
m.L
