Fanafihana intelo miantoana be izao no nitranga tao amin’ny kaominina Ankeriky, distrikan’Antsohihy. Ny roa ny alin’ny talata hifoha alarobia lasa teo ary vao afak’omaly alina ny iray. Vokany, olona roa no maty, novonoin’ireo olon-drasy tamin’ny fomba feno habibiana. Dahalo iray ihany koa lavo, vokatry ny fifanandrinan’ireo mpiandry tanana sy ny ireto andian-dahalo ireto. Mandry tsy lavo tanteraka ny mponina any amin’ity kaominina ity, araka ny fampitam-baovao azo. Raha ny fanazavana azo mantsy dia ireo mpiambina tanana mihitsy no nokendren’ireo olon-dratsy nandritra ireo fanafihana ireo. Mpiambina tanana (Jama) tao Androhibe mantsy ireto olona roa novonoin’izy ireo tamin’ny fomba mahatsiravina ireto ary avy eo nodoran’izy ireo ny tranony ary maty tao izy roa lahy, ny alin’ny talata. Voatosika kosa ireo andian-dahalo tao Antranolava, fanafihana ny alin’ny talata ihany sy tao Antanimbaribe, fanafihana ny alarobia alina teo, ary tsy nahazo afa-tsy omby roa tamin’iroa tanana voalohany, raha toa kosa ka maty voatifitra mihitsy ny mpanafika tao amin’ny tanana faharoa. Fantatra fa efa eny am-pelatanan’ireo tompon’andraikitra ny raharaha ary efa mandeha ny fikarohana sy ny fanaovana hazalambo ireo olon-dratsy.
m.L
