Efa tsy mifaditrovana intsony … Nampiharan’ireto lehilahy anankisivy be izao ny filan-dratsin’izy ireo ity tovovavy kely iray, 15 taona. Simba tanteraka ! Ny tapatapaky ny volana oktobra lasa teo nitranga ity tranga mampivarahontsana ity tao Ambohitrarivo, distrikan’Amparafaravola. Araka ny fampitam-baovaon’ny pôlisy dia avy nanatrika raharaham-pianakaviana ity ankizivavy ity no nandeha irery handeha hody. Azo heverina fa efa notilian’ireto olon-dratsy izy tamin’izay fotoana izay ary narahan’izy ireo. Nanaovany ny nataony amin’izay rehefa sendra dify lavidavitry ny tanana. Mazava ho azy, ankizivavy kely mandeha irery tokoa ve moa hahavita hahatohitra lehilahy miisa sivy be izao ? Nifandimbiasan’ireto tsy valahara ireto araka izany ity ankizivavy ity ary tsy namelan’izy ireo raha tsy vita ny sitrapony. Ny maraina vao tonga tany an-tranony ilay lasibatra. Ary tamin’izay ihany koa vao afaka nilaza tamin’ny ray aman-dreniny. Natao avy hatrany ny fizahana ary hita teo fa tena simba tanteraka ilay zaza. Nisy avy hatrany ny fitoriana napetraky ny ray aman-drenin’ny zaza ary nandray ny andraikiny avy hatrany pôlisy tao an-toerana nanao ny fikarohana ireo nahavanon-doza. Ny faramparan’ny volana teo, ny 21 sy 22 oktobra, no voasambotra avokoa izy sivy lahy. Samy nadoboka am-ponja vonjimaika avokoa moa miandry ny fotoam-pitsaràna azy ireo.
m.L
CASTRATION…VITE, VITE!!!!!