Tokony ho tamin’ny fito hariva, ny talata teo, eo am-panidiana tsena ny toeram-pivarotana amin’ny ambongadiny no tonga ny jiolahy ary nandroba. Tsy latsaky ny telo raha ny fanazavan’ny olona. Ny mihoatra an’izay tsy ferana satria misy mpitsikilo avy lavitra matetika ny fanaon’ny andian-jiolahy. Nanapoaka basy izy ireo mba nampitahorana ny olona, indrindra tamin’ny fitsoahana. Tsy nisy sahy nanaraka arak’izany ary dia nazava ny lalan’ny jiolahy. Tao anatin’ny fotoana fohy dia efa tsy nisy hita popoka izy ireo. Mbola manjaka ny jiolahy ary betsaka ireo manararaotra ny tanàna maizina noho ny fahatapahan-jiro mba hanatontosàna ny asaratsiny. Ny fanendahana no tena mirongatra ankehitriny, indrindra eny amin’ny faritra iva toa an’Andavamamba. Miferin’aina hatrany ny olona rehefa hivoaka sy hiditra ny trano. Ary na tsy ao an-trano aza dia mbola miahiahy ihany koa sao misy mamaky ny trano. Adin-tsaina lalandava…
D.R
