Vola vahiny « euro » sy « dollar », izay miteti-bidy any ho any amin’ny roa tapitrisa ariary tany ho any no azon’ireto olon-dratsy ireto, rehefa avy namaky trano fandraisam-bahiny iray teo Farafangana izy ireo, ny herinandro lasa teo. Roa andro taty aoriana, niakatra teo an-tsenan’i Farafangana ny iray tamin’ireo olon-dratsy, handeha hanakalo vola. Noraisim-potsiny. Raha ny fampitam-baovao azo, tamin’ny heriny androany no nitranga ity fandrobana ity tany an-toerana. Vazaha « hollandais » iray, miasa any an-toerana avy eo anivon’ny fandaharan’asan’ny firenena mikambana momba ny sakafo no lasibatra tamin’izay fotoana izay. Ankoatry ny vola, 150 euros sy 250 dollars, very tamin’izay fotoana izay, dia lasan’ireo olon-dratsy ihany koa ny solosaina fentin-tanana iray. Nametraka fitoriana avy hatrany ity terantany vahiny ity ary nandray an-tanana ny raharaha ny zandary tany an-toerana, nentina nikarohana ireo olon-dratsy. Tsy niandry ela dia nivaly ny fikarohana rehefa voapaingotra teo an-tsena ny iray. Nanao tohivakana ny fisamborana taorian’izay. Miisa telo ireo olon-dratsy no voasambotra taorian’izay. Telolahy izay voalaza fa isan’ireo nandray anjara nivantana tamin’ity asa ratsy ity. Marihana fa mbola hita tany amin’ny iray tamin-dry zalahy ireto ny vola vahiny, ambiny tsy voatakalo tamin’ireo nangalarina.
m.L
