Izy hamonjy fodiana no nifanehatra tamin’ny mpanendaka tetsy Ampasampito. Ankoatra ny fangalàna ny fitaovana rehetra sy ny vola teny aminy dia mbola noratrain’ireo tamin’ny zava-maranitra koa ilay rangahy. Mpanao gazety io farany ary avy namita iraka tany amin’ny faritra Vakiniadiana. Efa mba niaraka tamin’ny voan-dàlana kely sy ny sisa no nivoaka tampoka tao anaty maizina ny jiolahy. Tsy nisy namelan’ireo izay rehetra teny aminy, eny hatramin’ny karatra maha-mpanao gazety aza. Noho ny ratra nanjo azy dia voatery nentina teny amin’ny toeram-pitsaboana haingana izy. Ny tranga toy izao dia mbola manaporofo hatrany fa anjakan’ny tsy fandriampahalemana eto an-drenivohitra. Ny mpanao gazety izay matetika mody alina noho ny asany dia isan’ny tena miady aman’aina isan’andro. Efa betsaka izay niharan’ny herisetra izay kanefa tsy afa-miala aloha satria izay no fandaharam-potoanan’ny asa. Misy ihany ny orinasa sasany izay manakarama olona manokana, ankoatra ny mpamily miasa alina, manatitra ny mpiasa an-gazety hatreo an-tokonam-baravarany mba ho fiarovana ny aina. Vitsy ihany anefa no mahavita izany ary dia samy miaro ny tenany rehefa sendra ny ratsy.
D.R
